Cambre acolle, ao longo de todo o ano, diferentes eventos con fama non só no municipio, senón tamén no resto da comarca da Coruña. Con todo, de entre eles, o Entroido Pequeno Máis Grande do Mundo é, sen lugar a dúbida, un dos máis recoñecidos. A cita, na que participan miles de persoas edición tras edición, celebrarase este sábado, 17 de febreiro, convertendo a Cambre na capital do Entroido por antonomasia. O evento incluirá desfile, concurso de disfraces, carrozas e comparsas e música a cargo de Juan “O Chunguito”, Aixa Romay e a Orquestra Miramar.
Ese día, o desfile comezará ao redor das 16.00 horas. A comitiva partirá desde a rúa Wenceslao Fernández Flórez para continuar polo polígono de Graduil e concluír na zona do Campo da Feira. O percorrido estará amenizado pola música da charanga Malandros Escola de Samba.
Ao redor das 18.00 horas será a quenda do concurso de disfraces, comparsas e carrozas no que, tras a deliberación do xurado profesional, procederase á entrega de premios. A cita estará presentada por Juan Fernán e contará coa amenización de DJ Manri.
A partir das 20.00 horas, aproximadamente, subiranse ao escenario do Entroido Pequeno Juan “O Chunguito”, Aixa Romay e a Orquestra Miramar. DJ Manri actuará tamén no Entroido Pequeno. Os horarios do evento son orientadores.
Ante a previsión dunha gran afluencia de público, o Concello habilitará aparcadoiros disuasorios na zona do centro de saúde e no campo de fútbol Dani Mallo.
Enterro da Sardiña
O Concello despedirá o domingo, 18 de febreiro, o seu programa de Entroido co Enterro da Sardiña, no que se dará eterna sepultura ao Choqueiro coa participación dos grupos teatrais Cantheam e Dis que fan. O velorio terá lugar a fronte da Casa do Concello, a partir das 12.00 horas. Ao remate, o boneco depositarase nun carro para levalo aos Muíños de Norgasa, onde se realizará o tradicional lanzamento do boneco ao río.
O Choqueiro (tamén coñecido como Meco) é un personaxe vinculado ás desviacións morais e ao que se lle atribuían cualificativos como os de lacazán ou lambón. De feito, coñéceselle pola súa debilidade pola comida ou polo diñeiro.
