O Concello acaba de sacar a licitación do proxecto de reforma integral da praza Fernando Buesa. As obras, que saen a contratación por un valor estimado de 268.583 euros, servirán para potenciar e revitalizar esta praza, converténdoa nun novo punto de esparexemento e ocio no Temple. Para conseguir este obxectivo, o Concello actuará nunha superficie aproximada de 4.720 metros cadrados, moi similar á do parque Ramón Barba. Unha vez rematados estos traballos, o espazo será accesible, contará con máis áreas axardinadas e arborado, cun parque infantil ampliado e renovado e novas gradas.

Actualmente, a praza Fernando Buesa encóntrase nun estado aceptable de conservación. Non obstante, tanto o seu deseño como a súa configuración quedaron obsoletos. O proxecto municipal levarase a cabo en toda a superficie da praza, dando como resultado unha nova zona de ocio para a cidadanía. Estas actuacións buscarán un dobre obxectivo: por un lado, acondicionar o espazo priorizando a accesibilidade e a creación de máis servizos na praza. Polo outro, o Concello dará resposta ás demandas dos veciños e veciñas do Temple, incrementando as zonas verdes nesta parroquia, a máis poboada do municipio.

Os labores centraranse na mellora da accesibilidade e incluirán tamén a reubicación, ampliación e mellora do parque infantil existente na actualidade atendendo ás solicitudes dos propios veciños e veciñas. A maiores, crearanse servizos adicionais, aumentando así a oferta de usos en Fernando Buesa.

Aproveitando o desnivel e a incidencia do sol, a parte superior da praza contará con gradas que se poderán utilizar, non solo como punto de encontro e solárium, senón tamén para albergar espectáculos e funcións.

Actualización de prezos
O Concello xa sacou a licitación as obras en maio de 2022. Con todo, o proxecto quedou deserto debido aos sobrecostes nos prezos de materiais. Tendo en conta esta situación, o goberno local aprobou un suplemento de crédito para facer fronte a estos sobreprezos e actualizou o presuposto inicial.