Cambre xa conta os días para a celebración da V Galaicoi, que terá lugar o 15, 16 e 17 de xullo

20 Xuñ 2022

Tamén che pode interesar

Tras dous anos de parón pola emerxencia sanitaria, o concelleiro de Turismo e Patrimonio, Ramón Boga, sinala que a intención é que o evento “volva ao seu formato orixinal, ofrecendo, iso si, sorpresas especiais polo primeiro lustro de historia do evento”.

A menos dun mes vista da V Romaría Castrexo-Romana Galaicoi, o Concello de Cambre está a traballar xa para que a próxima edición sexa “memorable”. Así o confirma o edil de Turismo e Patrimonio, Ramón  Boga, que sinala a intención de que o evento “volva ao seu formato orixinal  despois de dous anos de pandemia, ofrecendo, iso si, sorpresas especiais coincidindo co primeiro lustro de historia do evento”.
O concelleiro sinala que se están ultimando todos os detalles da próxima cita, e avanza que a V  Galaicoi contará coas seguintes propostas: recreacións de batallas entre ambos os bandos (castrexos e romanos), talleres, mercado de artesanía, representacións teatrais, actividades, atraccións infantís e xogos tradicionais, espectáculos musicais, etc. Ao longo do próximo mes iranse desvelando todos os detalles da V  Galaicoi a través das redes sociais municipais (Facebook, Twitter e Instagram do  Concello de Cambre).
No 2020 levou a cabo unha  Galaicoi virtual, mentres que o ano pasado representáronse dúas funcións teatrais, unha traxedia e unha comedia.  Boga avanza que a intención é que Cambre “recupere este evento cuxo valor cultural, histórico e asociativo é indiscutible. A Galaicoi é unha celebración que naceu para recuperar e pór en valor parte da historia de Cambre, pero a presenza e implicación das asociacións é uns dos aspectos  máis importantes da cita”.