Cambre celebrou onte a súa primeira visita guiada nocturna á igrexa de Santa María de Cambre, pero non a última. Ante o éxito de asistencia, o Concello organizará unha nova sesión idéntica o próximo 13 de decembro, tamén ás 20.30 horas. O concelleiro de Turismo e Patrimonio, Ramón Boga, agradece “o enorme interese que as persoas participantes amosaron ao longo de toda a actividade”, e confía en que a seguinte experiencia “acade tamén un bo número de inscritos”.

Na proposta de onte tomaron parte cerca dun centenar de veciños e veciñas. Ao longo da mesma, o grupo coñeceu tanto a parte exterior como a interior da igrexa. Valéndose dunha lanterna, o concelleiro foi guiando as miradas do público cara cada elemento desta construción, brindándolle, ademais, unha breve explicación de cada un.

Co fin de que estas visitas sigan sendo “instrutivas e de caldiade”, haberá  unha cota máxima de 60 persoas. As persoas interesadas terán que inscribirse chamando ao teléfono do museo (981 65 62 17) ou enviando un correo a museo@cambre.org.  

A proposta está enmarcada dentro do programa As Noites do Museo e, con ela, búscase “desvelar os segredos dun dos maiores tesouros do noso municipio”, apunta Boga.