A xunta de goberno local aprobou, esta semana, o expediente de contratación da XV Xuntanza do Maior de 2023. Este encontro terá lugar o 21 de xaneiro e, durante o mesmo, prevese reunir a 750 persoas maiores de 65 anos no pavillón dos Campóns.

O evento arrincará ás 13.00 e concluirá ás 20.30 horas. Nesta ocasión, o menú constaría de tres pratos: callos de primeiro, carne asada con patacas e guarnición, de segundo, e larpeira e queixo do país con marmelo de sobremesa. Con todo, ademais da comida, os comensais poderán gozar da actuación musical a cargo dunha orquestra. O importe total do contrato ascende a 36.545,49 euros.

A actividade está integrada dentro da programación anual dirixida a veciños e veciñas da terceira idade do municipio. Con esta oferta, búscase fomentar a participación e o encontro social entre este colectivo.

A concelleira de Benestar Social, Mary Mer Prieto, sinala a importancia desta cita “ineludible para as persoas máis maiores do municipio”. A edil apunta que a Xuntanza do Maior “serve como punto de confraternización para os veciños e veciñas de todas as parroquias”.

Este evento estaba previsto que se celebrase en outubro de 2023, pero a tramitación do expediente retrasouse, por diversos motivos, o que fixo que a data se haxa tido que pospoñer ata xaneiro do 2024.