O Concello publicou hoxe a programación completa do evento, que terá lugar os días 15, 16 e 17 de xullo en Cambre.
O Concello de Cambre publicou hoxe o programa completo da quinta edición dunha das súas citas grandes: a Romaría Castrexo-Romana Galaicoi, que se celebrará o 15, 16 e 17 de xullo no castro de Cambre.
O programa arrincará o venres, 15 de xullo, ás 17:00 horas, coa asemblea dos clans. Esta actividade dará paso ao comezo das hostilidades entre castrexos e romanos. Desde ese momento e ata o final, os bandos enfrontados encerellaranse en múltiples batallas ata que o domingo, 17 de xullo, asinen o tratado de paz. O programa da romaría incluirá mercado, talleres, guerras e escaramuzas, desfiles, pasacalles e actividades de animación musical, representacións teatrais, etc.
Novidades desta edición
Este ano, incorporáronse dúas importantes novidades con respecto ás pasadas edicións: a organización de sesións vermú e de verbenas, o Campionato Castrexo para nenos e nenas e os II Xogos Olímpicos Castrexos, cuxas probas se sucederán ao longo de toda a programación.
No que a música refírese, a primeira actuación terá lugar o venres, 15 de xullo ás 23.00 horas, a cargo da Marabela de Cecebre. Ao día seguinte, sábado día 16, A Esmorga de Bribes amenizará a sesión vermú a partir das 15.00 horas. Ese mesmo día, ás 23.00 horas, a charanga Festicultores Troupe fará as delicias do público asistente. A última actuación musical no castro será o domingo, 17 de xullo, ás 14.00 horas coa charanga O Rumbo do Sardiñeiro-Fisterra.
Maior presenza de asociacións
No que ao tecido asociativo refírese, a V Galaicoi fixo historia. Tanto así, que na quinta edición contarán con cabanas no castro 24 entidades de todo o termo municipal e outros 14 particulares. Con todo, a romaría no castro estará aberta a todas as persoas que desexen sumarse.
