Clausura dos campamentos urbanos de Cambre, que contaron con máis de 400 participantes ao longo do verán

31 Ago 2022

Tamén che pode interesar

  • O programa celebrouse no CEIP Wenceslao Fernández Flórez entre o 1 de xullo e o 31 de agosto, ao longo de catro quendas.
  • Miguel Ángel Gutiérrez fixo hoxe entrega dos diplomas aos participantes e explicou que “este tipo de iniciativas reafirman a aposta do Concello polo fomento da conciliación”.

Hoxe, mércores 31 de agosto, clausuráronse os campamentos urbanos do Concello de Cambre, unha iniciativa creada para favorecer a conciliación das familias durante o verán e que contou con máis de 400 participantes.

 

Os nenos e nenas puideron estar no recinto desde as 7.30 ata as 16.30 horas, favorecendo así a conciliación das familias participantes. Os usuarios e usuarias dispuxeron de servizo de Mañanceiro, xantar, comida e transporte.

 

O programa celebrouse no CEIP Wenceslao Fernández Flórez entre o 1 de xullo e o 31 de agosto, ao longo de catro quendas. As actividades estaban dirixidas a nenos e nenas de 4º, 5º e 6º de educación Infantil, de toda Primaria e de 1º da ESO.

 

O concelleiro de Educación e Sanidade, Miguel Ángel Gutiérrez, asistiu hoxe ao acto de entrega de diplomas e explicou que “este tipo de iniciativas reafirman a aposta do Concello e da Concellería polo fomento da conciliación da vida laboral e familiar durante os períodos vacacionais dos nenos e nenas, un obxectivo que cumprimos co programa de Obradoiros de Semana Santa ou coas actividades que se puxeron en Nadal ou en Entroido”.

 

Durante o programa, os nenos e nenas fixeron actividades lúdico-deportivas e culturais e un módulo de igualdade. Con respecto a outras edicións, o Concello impartiu, en colaboración con COGAMI e COCEMFE, un taller formativo sobre campamentos inclusivos para o monitorado. Esta acción realizouse co fin de promover a inclusión das persoas con diversidade funcional.