O Concello satisfará as demandas das comunidades educativas dos CEIPs Wenceslao Fernández Flórez e Graxal coa próxima renovación dos parques infantís de ambos os centros de ensino. O proxecto, valorado en 41.807,31 euros, acaba de saír a licitación, e supoñerá a mellora de ambos os recintos de xogo.

O parque infantil do Wenceslao está dividido en dúas zonas cun firme de caucho. Actualmente, o pavimento da zona máis próxima ao pavillón atópase en moi mal estado, presentando fochancas e mesmo partes do chan sen adherencia e soltas. A maiores, detectáronse danos nalgunhas das estruturas de xogo, así como na pintura dos mesmos. Neste caso, as obras supoñerán a reparación dos xogos existentes, o arranxo do firme mediante pavimento continuo de caucho para a absorción de impactos e a renovación dos xogos tradicionais que se atopan no pavimento (tres en raia, twister, parchís, brilé), limpando, para iso, o pavimento con auga a presión e posterior marcaxe dos xogos.

No caso do CEIP Graxal, o pavimento é de caucho con lousas e nel sitúanse tres xogos (dous bambáns e un tobogán). O Concello expón unha mellora estética e funcional, o que supoñerá a eliminación destas lousas e o seu cambio por céspede sintético de seguridade. O recinto conta, ademais, cun xogo tipo casiña que o Concello restaurará. En particular, realizaranse os seguintes traballos: reparación dos xogos existentes nas dúas zonas para a súa posta a punto, cambio dos chans danados e das pezas deterioradas, reformulo dos xogos, marcaxe, reparación dos xogos do pavimento e subministración e instalación de tres elementos de xogos para nenos e nenas de entre 2 e 6 anos: balancín para catro usuarios, balancín para un e mesita recreativa para catro pequenos e pequenas.

Os traballos contan cun prazo de execución de dous meses a partir da data da firma da acta de comprobación do reformulo.