Fendetestas, o mural que o artista Mon Devane realizou en Cambre, acaba de converterse no mellor do mundo do mes de xullo segundo a plataforma Street Art Cities. Agora, a obra doutro dos muralistas do último Cromático Mural Fest podería conseguir tamén o título, converténdose así na mellor de agosto. Trátase de Enraizado no presente, do artista portugués Huariu. O alcalde, Óscar García Patiño, sinala “o enorme orgullo que supón para o Concello esta nova selección, que chega tras o éxito acadado por Mon Devane fai só uns días”. O rexedor espera que a obra de Huariu, situada en rúa O Balado, corra a mesma sorte que o Fendetestas e, para iso, anima a toda a cidadanía a apoiar esta candidatura co seu voto.

A creación de Huariu opta a este recoñecemento despois de superar dúas fases previas. En primeiro lugar, e grazas ao labor dos street art hunters (cazadores de arte urbana), a entidade fixo unha selección dun centenar de obras de entre preto de 1.000 cidades. A continuación, Street Art Cities publicitou as fotografías de cada un a través de redes sociais, sendo a propia audiencia a encargada de escoller aos 25 favoritos. Precisamente, a creación de Huariu alzouse como unha das máis populares e, agora, está seleccionada como finalista para ser a mellor do mes de agosto.

As persoas poderán votar polo mural de Cambre no formulario habilitado pola organización. O prazo para emitir votacións estará aberto ata o 7 de setembro.

A infancia, protagonista do mural

Tal e como o propio Huariu revelou nas súas redes, o mural apela á infancia. Nel, un neno mira a unha bolboreta que descansa sobre o seu ombreiro. Como indica o autor, trátase dunha escena cotiá que esconde unha pregunta clave: canta importancia lle damos a cada momento? Enraizado no presente fala, precisamente, da necesidade de prestar atención aos pequenos momentos que suceden ao noso ao redor.