Cambre terá, por primeira vez na historia, un Poboado de Nadal para os máis nenos e nenas. A iniciativa chegará ao parque Ramón Barba entre o 22 de decembro e o 5 de xaneiro de 2023, ofrecendo espectáculos, talleres e visitas de Papá Noel aos máis pequenos e pequenas da casa. Esta será, unicamente, unha das propostas da programación do Nadal do Concello, que incluirá tamén a campaña de Rasca e Gana e a celebración do XIV Concurso de Escaparates.
Por unha banda, o parque Ramón Barba acollerá, ata o 5 de xaneiro, varias casetas onde se levarán a cabo talleres e visitas de Papá Noel e os seus elfos. A maiores, sempre que as condicións climatolóxicas o permitan, estas propostas combinaranse con outras actividades ao aire libre. Salvo os días 25 de decembro e 1 de xaneiro, haberá un taller infantil de forma diaria. En canto ao horario, estes serán de 17.00 a 21.00 horas, menos o 24, o 31 de decembro e o 5 de xaneiro, cando se organizarán de 12.00 a 14.00 horas e de 17.00 a 19.00 horas. Acompañados por monitores, os e as participantes realizarán talleres de decoración de bolsas de papel, adornos para a árbore, colaxe, cociña, portavelas, chapas, pestillos, reciclaxe, centros florais, monicreques e agasallos. Podedes consultar a programación completa.
Os nenos e nenas que desexen coñecer a Papá Noel e aos elfos terán a ocasión de facelo os días 22 e 23 de decembro (de 17.00 a 21.00 horas), e o 24, de 12.00 a 14.00 e de 17.00 a 19.00 horas. O Poboado será, ademais, o escenario do espectáculo Kote (30 de decembro ás 18.00 horas), no que se combinarán o circo, o teatro, os malabares e o humor.
Dinamización comercial
O concelleiro de Desenvolvemento Socioeconómico, Diego Alcantarilla, reuniuse, nos últimos días, cos responsables dos comercios do municipio. O obxectivo deste encontro non foi outro que explicarlles as accións que conforman a campaña de dinamización comercial do Concello. Alcantarilla destacou que, un ano máis, o Concello poñerá en marcha o Rasca e Gana e o Concurso de Escaparates: “trátase de dúas iniciativas que colleitan, ano tras ano, un grande éxito de participación, polo que agardamos que este ano funcionen mesmo mellor que en anteriores edicións”. O edil confía en que ambas as propostas sirvan “para impulsar as compras non tecido comercial durante estas datas sinaladas”.
O Rasca e Gana de Cambre distribuirá, nesta convocatoria, premios por valor de 10.000 euros. Esta contía estará repartida da seguinte forma: 225 bonos de 20 euros, 45 bonos de 50 euros, 25 de 100 euros e 3 de 250 euros. A maiores, as persoas que consuman nos comercios adheridos poderán facerse con 65 lotes de produtos de Nadal valorados en 65 euros e con outros cinco cun valor de 125 euros. O Concello sorteará, así mesmo, outros dez lotes nas feiras municipais.
XIV Concurso de Escaparates
Por último, o Concello organizará unha nova edición do seu Concurso de Escaparates, no que poderán participar: comercios, locais e/o negocios de hostalería e establecementos de servizos persoais que desenvolvan a súa actividade económica no termo municipal, teñan un establecemento aberto ao público e un escaparate decorado con motivos do Nadal, durante o período comprendido entre o 16 de decembro e o 5 de xaneiro de 2023.
En total, entregaranse premios por valor de 4.000 euros repartidos da seguinte forma:
- 1º premio: 1.000 euros
- 2º premio: 700 euros
- 3º premio: 500 euros
- Accésits por sustentabilidade (400 euros) e por adecuación ao produto (400 euros)
- Premio por votación popular de 1.000 euros
O prazo de inscrición estará aberto ata o 15 de decembro. Os negocios que desexen anotarse poderán facelo a través da sede electrónica ou nos rexistros do Concello (pedindo cita previa).
