Faite oír! Ese é o lema da campaña de participación cidadá da Oficina Municipal de Información Xuvenil –OMIX- do Concello de Cambre. O obxectivo da iniciativa, tal e como explica o concelleiro de Deportes e Xuventude, Daniel Mallo, non é outro que “involucrar aos mozos e mozas para que fagan as súas achegas ao departamento de Xuventude. Queremos coñecer as súas opinións e as súas propostas para as dúas instalacións xuvenís, Casa Arrigada e Casa Palmeiras”.

A xornada de participación terá lugar o venres, 7 de outubro de 18.00 a 20.00 horas, tanto en Casa Arrigada como na Casa Palmeiras. Os mozos que desexen participar terán que apuntarse previamente enchendo o formulario dispoñible na web da OMIX. Poderán anotarse ata o propio día no que se celebrará a actividade. Lonxe de ser unha acción puntual, o departamento pon en marcha, ano tras ano, diferentes medidas para coñecer a opinión dos seus usuarios e usuarias.

Decidámolo Xuntos

Non só os máis novos poderán trasladar as súas ideas e proposicións ao Concello. De feito, a través do programa Decidámolo Xuntos, os veciños e veciñas de todas as idades poderán facer o propio, facendo chegar as súas ideas aos orzamentos de 2023.

O período de presentación estará aberto ata o 18 de outubro. As persoas interesadas poderán realizar as súas achegas telemáticamente a través da páxina web decidamoloxuntos.cambre.es. Así mesmo, os veciños e veciñas poderán encher o formulario correspondente e entregalo por algunha das seguintes vías: depositándoo nos buzóns dispoñibles nos centros sociais de cada parroquia, nos rexistros municipais ou enviándoo por correo electrónico á dirección decidamoloxuntos@cambre.org.

Unha vez pechado o prazo de presentación de propostas, procederase á avaliación das mesmas. A continuación, entre o 29 de outubro e o 7 de novembro, abrirase o período de votación das mesmas e determinarase que iniciativas incluiranse no documento orzamentario do Concello de Cambre.