Varios veciños e veciñas trasladáronnos dúbidas e consultas con respecto ás árbores do parque Ramón Barba. Desde o Concello de Cambre aclaramos o seguinte: 

• Antes do inicio dos traballos, unha empresa especializada levou a cabo un estudo analizando todos os exemplares de árbores e arbustos que se atopan no parque.
• Nese estudo outorgáronse cualificacións aos exemplares do parque: intocable, a manter, a substituír a medio prazo e exemplar a talar.
• Á hora de decidir que exemplares se ían substituír ou talar tívose en conta o estado no que estes se atopaban. Deste xeito, observouse que algúns exemplares, fundamentalmente tuias, estaban en malas condicións e que mesmo presentaban afección fúnxica. Esta circunstancia podía ser un risco, non só para estes árbores, senón tamén para o resto.
• Noutros casos, detectouse que algunhas árbores competían con outras, limitando o crecemento das segundas. Nesta situación, os expertos priorizaron as árbores que reunían un mellor estado e tamén unhas mellores características.
• A maiores, había algúns exemplares que non permitían a creación de entradas de luz.
• Aclaramos que no parque se colocarán novas árbores co suficiente porte para contar, a curto e medio prazo, con zonas de sombra.
• A idea deste proxecto é revitalizar o parque Ramón Barba, consolidándoo como unha das zonas verdes máis importantes do municipio. Para conseguilo, dotarase o parque de árbores de folla perenne e non caduca.
• Ademais de no propio recinto, o Concello colocará tamén árbores na contorna do parque infantil da Rúa Francisco Rodríguez. Todos estes traballos darán como resultado a creación dunha gran área verde, ampliando a que existe, na actualidade, no propio Ramón Barba.

Todos os veciños e veciñas poden consultar o estudo realizado pola empresa especializada.