Máis de 250 veciños solicitaron xa cita para consultar o PXOM de Cambre

24 Xan 2023

Tamén che pode interesar

Máis de 250 veciños e veciñas solicitaron xa cita para consultar o Plan Xeral de Ordenación Municipal de Cambre. Así o confirmou, esta mañá, o alcalde, Óscar García Patiño, lembrando que o prazo de exposición pública abriuse o pasado venres: “esta nova fase estará marcada pola participación cidadá, algo que consideramos fundamental para continuar enriquecendo este documento de planeamento, o máis importante para que Cambre continúe medrando”. O período de alegación estará aberto dous meses contados desde o día seguinte á publicación do anuncio no Diario Oficial de Galicia.

A documentación do PXOM pode consultarse tanto na páxina web como na propia Casa do Concello. Neste segundo caso, os veciños e veciñas poden achegarse a mirar os planos e os documentos ao salón de plenos ou, se o desexan, poden pedir cita para ser atendidos por persoal municipal. O expediente pode consultarse de luns a venres de 8.00 a 15.00 horas. En caso de requirirse asistencia técnica, o horario de atención será de luns a venres de 10.00 a 13.30 horas.

Para pedir cita previa, os cambreses e cambresas dispoñen de tres vías:

  • O teléfono 981 61 31 28
  • A páxina web de cita previa (seleccionando o rexistro de Cambre, área de Urbanismo e o apartado específico do PXOM habilitado no tipo de cita)
  • Acudindo, presencialmente, á Casa do Concello

O período de exposición pública é un dos pasos previos da aprobación provisional do documento. Unha vez conclúa esta etapa, a empresa estudará todas as achegas formuladas polos veciños e veciñas e polas diferentes administracións e aplicará os cambios e axustes necesarios no plan para, a continuación, elevalo ao pleno para a súa aprobación provisional.