O Museo do Xacemento Romano converteuse nunha parada obrigatoria en Cambre. Así, ao longo do 2024, a instalación municipal recibiu a 610 persoas que participaron nas visitas guiadas que organiza o Concello para poñer en valor o seu patrimonio e historia. En relación ao 2025, o número de persoas que tomaron parte nesta actividade é, ata a data, de 205, fixándose novas propostas para o 30 de abril e para os días 9 e 23 de maio.
A iniciativa inclúe, non só un percorrido polo propio Museo do Xacemento Romano, senón tamén á igrexa de Santa María de Cambre, outro dos principais reclamos turísticos do municipio. Como explica o concelleiro de ADL, Turismo e Patrimonio, Ramón Boga, “o obxectivo non é outro que dar a coñecer a nosa enorme riqueza patrimonial e histórica. Trátase de visitas didácticas que se poden adaptar a persoas de todas as idades”.
Da cifra total de visitantes, a maioría correspóndese con grupos de alumnos dos colexios e institutos de Cambre. No segundo caso, a través dos programas de intercambio Erasmus+ organizados polos centros de ensino, coñeceron o Museo mozos de Oxford, Cracovia, Bulgaria e Austria.
A dependencia municipal recibiu tamén a visitantes de municipios limítrofes como Oleiros ou doutras partes de Galicia como, por exemplo, Palas de Reis, Burela e Vigo. Deste último concello acudiron, precisamente, un grupo de estudantes do máster Interuniversitario en Arqueoloxía e Ciencias da Antigüidade da Universidade de Vigo.
En canto a épocas do ano, aínda que estas propostas repártense ao longo de todos os meses, os de marzo e xullo de 2024 foron, ata o de agora, os que concentraron un maior número de visitas, con tres visitas cada un.
As persoas interesadas en solicitar unha visita guiada poderán formular a súa solicitude a través do correo electrónico museo@cambre.org ou do teléfono 981 65 62 17.
Próximas melloras
O Museo do Xacemento de Cambre recibiu, este mes, o diploma de recoñecemento ao compromiso para a mellora da calidade no marco do Sistema Integral de Calidade Turística en Destinos. En paralelo, dentro do programa da feira Biocultura, outorgóuselle tamén o certificado de pertenza á Rede de Centros de Información Territorial da Reserva de Biosfera Mariñas Coruñesas e Terras do Mandeo.
Froito da colaboración entre a Reserva de Biosfera e o Concello, o Museo será obxecto, proximamente, dunha serie de melloras. Tendo en conta as necesidades trasladadas por Ramón Boga, levarase a cabo a instalación dun novo equipo audiovisual co que se proxectarán películas, documentais e material gráfico para acompañar a conferencias, por exemplo. Así mesmo, dotarase ao Museo dunha nova vitrina coa que se ampliará o espazo expositivo.
