Vila Concepción acollerá o vindeiro xoves, 11 de abril, a presentación de Cinza (2023), o cómic de Manel Cráneo baseado en  A nosa cinza, un dos grandes clásicos da literatura galega. A cita contará coa presenza do ilustrador e autor do cómic, Manel Cráneo, e do escritor da obra orixinal, Xavier Alcalá.

Xavier Alcalá publicou A nosa cinza no ano 1980. Máis de corenta anos despois, no 2023, Cráneo decidiu adaptar esta novela e convertela en viñeta. Cinza conta a vida de Xoán, un mozo criado durante a ditadura, orfo de nai, fillo de médico e de familia galeguista. A historia narra o paso do protagonista desde a infancia ata a adolescencia, situando ao lector en varias experiencias vitais cotiás como o descubrimento da amizade verdadeira, os medos ou o primeiro amor.

A cita levarase a cabo ás 20.00 horas na Casa da Cultura. O acceso á actividade será libre ata completar a capacidade.