Cambre celebrou, esta mañá, un pleno cun único punto na orde do día: a toma de coñecemento da renuncia presentada por María Pan ao cargo de alcaldesa. A agora exrexedora xa anunciara esta decisión a semana pasada, cualificándoa como “un paso necesario para que quen intenta gobernar desde a oposición o faga desde o goberno”. Pan Lesta subliñou que “hoxe arrinca unha nova etapa na que UxC seguirá traballando polo interese xeral de Cambre, estea onde estea a partir do pleno de investidura”.
Durante a súa intervención, a exalcaldesa desexou que o período que se abre “veña marcado pola valentía política e pola toma de decisións acertadas a prol dos veciños e veciñas”.
“O traballo feito”
Pan Lesta incidiu en que Unión x Cambre “deixou o traballo feito” e enumerou algúns dos asuntos abordados no último ano. “O PXOM está en tramitación; están a piques de adxudicarse varias obras do Plan Único da Deputación; e está pendente de informe a obra do campo de fútbol de Lendoiro”. Pan Lesta referiuse, ademais, ao traballo realizado para regularizar os servizos municipais en precario: “estanse a cambiar novamente os pregos de limpeza de instalacións municipais e mantemento de zonas verdes e os pregos do servizo de abastecemento de auga xa están no Concello pendentes da revisión dos técnicos municipais”.
Orzamento de 2025
Pan Lesta apuntou, ademais, que o “orzamento de 2025 queda aí e sería unha falta de respecto cara a veciñanza desbotar un documento que se elaborou tras manter varias reunións con todos os grupos da oposición nas que tiveron a ocasión de facer as súas propostas”. A exprimera edil lembrou, ademais, que está lista “a proposta da nova RPT, así como a modificación puntual da Relación de Postos actual para crear eses postos A1 tan necesarios en Secretaría e Intervención”.
María Pan subliñou que a solución á situación que vive Cambre “é de carácter político e pasa, necesariamente, pola defensa sen fisuras do interese xeral, que moitas veces quedou relegado polos concelleiros e concelleiras dalgúns partidos da corporación que suman maioría”.
