“Unión x Cambre é un partido local formado por veciños e veciñas e, por iso, somos conscientes de que ante a situación de bloqueo do Concello non hai máis tempo que perder. Imos gobernar en solitario, mantendo a liña de traballo destes últimos meses e poñendo o interese da cidadanía por enriba de todo”. Así o confirmou a alcaldesa de Cambre, María Pan Lesta, avanzando a configuración do goberno: “estará configurado en sete áreas e todos e todas traballaremos cunha folla de ruta moi clara que pasará por facer que Cambre volva á senda dá estabilidade e do crecemento”.
As sete áreas serán as seguintes:
- Presidencia: María Pan Lesta
- Urbanismo, Obras, Servizos, Transporte e Medio Ambiente: Juan González Leirós
- Economía, Facenda, Innovación Tecnolóxica e Seguridade Cidadá: Daniel Mallo Castro. O concelleiro será tamén o portavoz do goberno.
- Servizos Sociais e Recursos Humanos: Yolanda Díaz Baldomir
- Axencia de Desenvolvemento Local, Patrimonio e Turismo: Ramón Boga Moscoso
- Desenvolvemento Asociativo, Educación e Sanidade: María Carmen Pan Matos
- Cultura, Deportes e Xuventude: David López Saborido
Outra das principais novidades será a relacionada coas xuntas de goberno local. Ademais dos concelleiros de Unión x Cambre, os edís de Alternativa dos Veciños (Raúl Varela Fraguío e Manuel Castro Uzal) participarán tamén neste órgano colexiado. Pan sinala que chamou a todos os grupos para propoñerlles entrar nas xuntas de goberno, pero só mantivéronse reunións con AV e co BNG, que foron “os que sentaron a falar sobre este tema”. Neste sentido, a alcaldesa entende que a presenza dos concelleiros de AV nas xuntas de goberno “serviralles para analizar os pasos que se están dando para solucionar a situación da Administración local e para propoñer as súas achegas”.
Diálogo con todas as forzas
A primeira edil agradece “a predisposición amosada polos grupos e, en particular, por Alternativa dos Veciños, que demostraron ter un interese real en querer solucionar esta parálise e acordar os temas importantes para Cambre e para a súa veciñanza”. A alcaldesa convida aos demais grupos para “reflexionar” en aras de aprobar en pleno as dedicacións e retribucións da alcaldesa, os concelleiros e do persoal eventual, un paso que cualifica como “esencial para poder estabilizar este goberno que segue traballando co obxectivo de devolver a Cambre a unha situación de tranquilidade e normalidade”.
Pan Lesta tamén agradece a predisposición do BNG para poñer sobre a mesa todos os asuntos de interese para Cambre e a buscar solucións consensuadas. A rexedora considera que “o camiño que se empezou a andar en canto ao diálogo e a negociación debería ser tamén o que marcase os próximos tempos en Cambre. Diálogo é a palabra que máis repetín no meu discurso de investidura, un diálogo que permitiu avanzar nas últimas semanas e que espero que vaia dando froitos nos próximos tempos”.
Proposta de dedicacións e soldos
“Somos conscientes que, con sete concelleiros, o labor do persoal de confianza é fundamental e, por iso, levaremos a pleno unha proposta na que só haberá cambios de denominacións dos postos do persoal eventual e o cambio dunha media dedicación a unha xornada do 80 %”. Pan aclara, ademais, que os soldos dos edís do goberno permanecerán “igual que os aprobados a comezos de lexislatura a pesar de que a carga de traballo de cada edil verase incrementada de xeito considerable”. En canto a retribucións, o único cambio será o da alcaldesa, que pasará a ter a dedicación exclusiva cunha retribución que superará nun euro á da secretaria municipal.
“Son consciente de que un goberno en minoría conleva, sobre todo, diálogo e negociación continua cos diferentes partidos para sacar os temas adiante, pero confío en que aqueles de interese xeral e prioritarios para Cambre non atoparán un voto en contra do resto dos partidos. Por iso, agardo que nos permitan sacar adiante tanto as retribucións como o persoal eventual para poder darlle a Cambre estabilidade política canto antes”.
A expensas de celebrar o pleno para abordar ambos os puntos, os concelleiros xa están dedicados plenamente ás súas áreas algo que agradece a alcaldesa publicamente.
Folla de ruta
A rexedora subliña que a folla de ruta do goberno estará centrada en seguir dando pasos de fronte ao “desbloqueo do Concello, priorizando, por enriba de todo, o pago das facturas aos provedores e ás entidades locais e a regularización dos contratos que se atopan en precario”.
A alcaldesa aclara que se trata dun labor que “xa botou a andar hai meses e cuxos froitos espera se vexan máis cedo que tarde. Hai dous temas fundamentais que son acabar coa liquidación do orzamento 2023 que está xa ultimándose en Intervención e a aprobación dos orzamentos de 2024 que están para informe de Intervención desde o pasado 8 de abril despois do informe desfavorable de Intervención ao primeiro documento orzamentario presentado”.
