Metamorfose, a obra que Ricardo Romero pintou no lugar de Castrobó, conseguiu a quinta posición na clasificación de mellores murais de agosto de Street Art Cities. A obra de Romero fora seleccionada entre unhas 100 propostas e competía con outras 24 para alzarse co título.
A creación do artista portugués optou a este recoñecemento despois de lograr o voto do público nas redes sociais da plataforma, que selecciona cada mes algúns dos mellores murais grazas aos street art hunters (cazadores de arte urbana).
O alcalde, Óscar García Patiño, sinala “o enorme orgullo que supón que Cambre posiciónese a nivel internacional dentro do mundo do muralismo grazas ao talento e traballo de artistas como Ricardo Romero”. O concelleiro de Cultura, David Saborido, apuntou, ademais, o mérito que ten alcanzar esta posición: “a creación de Romero foi seleccionada entre cen obras, todas elas dun elevado nivel”.
Nomeamentos
Este non é o primeiro nomeamento que Cambre recibe por parte de Street Art Cities. O talento de Mon Devane (Fendetestas) e Huariu (Enraizado no presente) supuxeron dous nomeamentos nos meses de xullo e agosto, respectivamente. Ademais, ambos os murais optaron a converterse no mellor do mundo no 2022.
