A aprobación inicial da primeiro PXOM (Plan Xeral de Ordenación Municipal) do Concello de Cambre podería producirse o próximo mes. Así o confirmou o alcalde, Óscar García Patiño, indicando, ademais, que a intención é “celebrar, de xeito previo, unha reunión informativa cos voceiros e voceiras de todos os grupos da corporación e coa empresa redactora do documento para resolver calquera dúbida que poidan ter”. Unha vez que se manteña este encontro, a previsión é celebrar un pleno con carácter extraordinario para aprobar o documento.
O rexedor cualificou o PXOM como «o documento máis importante do Concello, na medida en que permitirá seguir estimulando o crecemendo do noso municipio”. Como apuntou García Patiño, para a súa elevación a pleno faltaría, unicamente, o informe dos departamentos de Secretaría e Intervención.
Mobilidad e transporte
Como indicou o alcalde, o PXOM recolle numerosas melloras en materia de transportes e mobilidade. Por unha banda, o Concello aposta polo tren de proximidade como un medio alternativo ao coche para vertebrar e conectar a área metropolitana e mesmo para achegar o municipio á cidade de Ferrol. Polo outro, o documento reflicte novas infraestruturas viarias que buscarán tamén mellorar a conexión entre Cambre e o resto de municipios da comarca. Entre elas, o Plan Xeral expón unha Vía Ártabra con conexión coa AP-9 e a A-6.
Compromiso ambiental
O rexedor avanzou que o PXOM de Cambre reflectirá o compromiso do equipo de goberno “coa preservación e o coidado do medio ambiente”. Desta forma, García Patiño sinalou que se poñerá en valor o patrimonio fluvial do municipio: non só en río Mero, senón tamén o Valiñas, Brexo, Gándara, San Benito, San Pedro e San Marcos. No documento buscarase garantir a integración dos elementos da estrutura forestal, preservar as áreas de valor ecolóxico, protexer os espazos naturais, garantir a conexión ecolóxica e favorecer o aproveitamento da natureza e das paisaxes. Isto é, o plan xeral contemplará un maior número de parques e itinerarios ambientais que dean servizo, non só aos veciños e veciñas de Cambre, senón tamén aos dos concellos limítrofes.
Previsión de vivendas
No tocante á vivenda, a previsión é construír unhas 5.000 nos próximos 30 anos. Así mesmo, o PXOM servirá para reafirmar que Cambre é unha peza esencial no desenvolvemento da área metropolitana. O documento potenciará a Vila de Cambre como nodo de servizos e buscará converter o eixo A Barcala-O Temple- O Graxal nun centro urbano e de actividade comercial e terciaria da área. Outra das premisas é ampliar o polígono do Espírito Santo para convertelo nun centro de actividade empresarial polas súas excelentes calidades de accesibilidade e pola súa posición estratéxica.
