O alcalde, Óscar García Patiño, remitiu, esta mañá, un escrito á Deputación da Coruña para reiterar unha importante solicitude en materia de seguridade viaria: a creación das beirarrúas no quilómetro 3 da DP-1702, na contorna da glorieta da Rocha. Trátase dunha reivindicación que o rexedor xa trasladara no seu momento e coa que se garantiría o reforzo da seguridade e accesibilidade nesta zona.

Na actualidade, existen beirarrúas en toda a zona da rotonda excepto neste punto da estrada provincial, onde non hai senda peonil en ningunha das dúas marxes da vía.

A execución destas beirarrúas reforzaría as condicións de seguridade para os peóns que acceden á N-550 desde o lugar da Cabana. Neste lugar rexístrase tráfico abundante e, ademais, hai pouca visibilidade debido a que está en curva. Trátase, como explica o alcalde, dunha petición “trasladada tamén pola propia veciñanza, que pide solucións para reforzar a seguridade neste punto”.