Cambre repetirá, este verán, como sede do Campus Javi Muñoz. O programa, organizado polo Club Baloncesto Cambre e o Xuncas Diversia (Lugo) en colaboración co Concello, busca achegar os valores do baloncesto aos máis novos. O alcalde, Óscar García Patiño, o concelleiro, Daniel Mallo, o director deportivo do campus, Javier Muñoz, o director técnico, Fernando Díaz, o manager xeral, Anxo Nadela (un cargo que comparte xunto a Carlos Pascual), e o secretario do CB Cambre, Marcos Prieto Souto, presentaron, esta mañá, o programa.
Na presentación, o rexedor destacou o “orgullo” de que Cambre volva ser epicentro do baloncesto, acollendo “unha nova edición do campus tras o éxito da pasada convocatoria”. Así mesmo, García Patiño agradeceu “o importante labor que realizan desde o Club Baloncesto Cambre para ensinar e achegar esta práctica deportiva aos máis novos”.
Pola súa banda, Javier Muñoz agradeceu a colaboración e o apoio do alcalde e o edil, así como de todo o Concello, unha cooperación que fará posible “vivir uns días emocionantes nos que esperamos que os participantes do campus se divirtan aprendendo técnicas e tamén os valores que ten o deporte, en xeral, e o baloncesto en particular”. Desde o Xuncas apuntan, ademais, o enorme interese que a iniciativa suscitou entre os máis novos, algo que se demostrou no “aumento do número de participantes que, nesta ocasión, chegará ata o centenar de usuarios e usuarias”.
O Campus Javi Muñoz celebrarase entre o 15 e o 23 de xullo e está dirixido a mozos nados entre os anos 2006 e 2012. Os adestramentos realizaranse nos pavillóns do Graxal, no Bernardo Bish de Brexo-Lema, no Sofía Toro e no de Anceis.
Unha experiencia completa
O grupo de traballo do campus estará conformado por un preparador físico, por un asistente técnico sanitario, por un fisioterapeuta e por monitores especializados en actividades de tempo libre. Máis aló dos adestramentos, o campus ofrecerá tamén propostas de lecer. Ao longo da experiencia, as persoas participantes poderán realizar saídas e outras actividades complementarias.