Inundar as redes con mensaxes sobre a igualdade e en contra da violencia de xénero. Ese é o obxetcivo que o Club Béisbol e Sófbol Cambre se marcou para a súa campaña anual polo 25N, Día Internacional da Eliminación da Violencia contra a Muller. A Casa da Cultura Vila Concepción acolleu, onte, a presentación oficial da iniciativa, na que tomaron parte a concelleira de Deportes, Ana Rodríguez, a concelleira de Benestar Social, Mary Mer Prieto, o presidente do CBS Cambre, Jhonny Pérez Terán, e a secretaria do club, María Fernanda Jóver.
Como novidade con respecto aos últimos anos, tal e como avanzou a secretaria do CBS, “a campaña ampliouse con respecto aos últimos anos, e estará activa durante todo o mes de novembro”. Esta constará de varias actividades. Por un lado, utilizaranse as redes sociais do club (Facebook, Twitter e Instagram) para publicar numerosos mensaxes de concienciación a favor da igualdade e en contra da violencia machista. O obxectivo, como explicou o presidente, “é chegar ao maior número de persoas posible, abarcando a veciños e veciñas de todas as idades”.
Como parte do programa polo 25N, o Club celebrará dúas citas deportivas: o Torneo a favor da loita pola tolerancia e non violencia de xénero e o Torneo a favor da Igualdade entre Homes e Mulleres. O primeiro terá lugar o sábado, 18 de novembro, e en el participarán equipos de alevín-infantil do CBS Cambre, do Club Lume (Lugo) e do Club Os Tilos (Teo). O segundo evento terá lugar o propio sábado, 25 de novembro, e contará coa participación do CBS Cambre A, Cambre B e Cambre C. Ambas citas levaranse a cabo no pavillón do Temple. A maiores, a entidade preparou tamén unhas chapas conmemorativas co mensaxe Tod@s somos béisbol y sófbol.
Durante a súa intervención, a concelleira de Deportes agradeceu o traballo que realizou “e continúa realizando o CBS Cambre a prol da igualdade”. Na mesma liña, a edil de Benestar Social sinalou que este tipo de iniciativas continúan sendo “necesarias para promover unha igualdade real entre homes e mulleres, tamén no eido deportivo”.
