O Concello abrirá o luns, 19 de xuño, o prazo de solicitude do Mañanceiro, un dos programas cos que se busca promover a conciliación da vida laboral e familiar durante o curso escolar. A próxima convocatoria estará dispoñible nos seguintes centros: E.E.I. San Bartolomeu de Pravio e nos CEIP Wenceslao Fernández Flórez, Gonzalo Torrente Ballester, Emilio González López, Graxal e Portofaro. Para poñelo en marcha en cada un será preciso que haxa un mínimo de 6 prazas, podendo haber ata 26 solicitudes por centro de ensino.
O concelleiro de Educación e Sanidade en funcións, Miguel Ángel Gutiérrez, sinala o compromiso do goberno local en materia de conciliación: “continuamos traballando para poñer en marcha programas e medidas que alivien e axuden ás familias do municipio co coidado dos seus fillos e fillas”.
A través do Mañanceiro, que funciona de luns a venres, os escolares poden acceder ao recinto escolar ás 7.30 horas e permanecer alí ata o inicio das horas lectivas. O programa ofrece tamén a posibilidade de almorzo para os pequenos e pequenas. Os veciños e veciñas poderán, así mesmo, solicitar o mes completo ou pagar por días soltos (ata 12).
O formulario deberá presentarse a través da sede electrónica do Concello ou en calquera dos rexistros municipais.
O período de inscrición estará aberto entre o 19 de xuño e o 19 de xullo.
