Esta axuda económica en forma de bonos permite aos veciños e veciñas de Cambre con problemas de mobilidade a utilización de taxis para os seus desprazamentos cando non poidan facer uso do transporte público. A través deste programa, os beneficiarios poderán utilizar estes vales para xestións administrativas -traslados a bancos, xestorías, acudir ao Concello, Seguridade Social, Facenda, Axencia Tributaria, etc.-, para visitas médicas, actividades culturais, deportivas, educativas e de lecer, así como por outros motivos para valorar polos servizos sociais municipais.
Na pasada convocatoria, o Concello recibiu 30 solicitudes. Tras a revisión e o envío dos requirimentos coa finalidade de emendar a documentación presentada, incompleta ou defectuosa, 23 cumpriron cos requisitos para a concesión da axuda económica individual.
A convocatoria desta 2023 conta cun orzamento de 20.000 euros, 5.000 euros máis con respecto ao ano pasado, e cada usuario e usuaria poderá percibir un máximo de 700 euros anuais. O prazo de solicitude estará aberto ata o 28 de febreiro, inclusive, debendo formalizarse as peticións nos rexistros municipais de forma presencial ou de maneira telemática a través da sede electrónica do Concello de Cambre.
A concelleira de Benestar Social, Lúa Sanguiñedo, sinala que este tipo de axudas “son unha medida máis para coidar dos nosos veciños e veciñas, mellorando a autonomía, autoestima e calidade de vida daqueles que teñen problemas de mobilidade”.