Os veciños e veciñas que estean interesados en traballar para a planta que Amazon vai abrir no polígono do Espírito Santo deberán inscribirse na lista de demandantes de emprego do Concello de Cambre, que xestionan desde a área de Desenvolvemento Socioeconómico. A multinacional abrirá a inscrición de solicitudes a partir do día 29 de xullo.
Así o confirmou a alcaldesa, María Pan, tras a última reunión mantida xunto ao concelleiro da Axencia de Desenvolvemento Socioeconómico, Patrimonio e Turismo, Ramón Boga, e a coordinadora da área con representantes da empresa. Ofertaranse ao redor de 70 postos na nave loxística como mozo/a de almacén. Para optar aos mesmos, os veciños terán que estar rexistrados na lista de demandantes de emprego do Concello.
Os cambreses que necesiten máis información poderán contactar con ADL a través do teléfono 981 61 31 96 e do correo electrónico adl@cambre.org.
Cifras de emprego
A alcaldesa, María Pan, incide en que se trata dunha noticia “moi positiva que vai permitir estimular as cifras de emprego no municipio”. A rexedora incide en que os veciños e veciñas “deberán superar todas as probas deste proceso selectivo, como terán que facer o resto de aspirantes, pero como se acordou, terán esa prioridade á hora de optar aos postos”.
A primeira edil lembra que este non é o primeiro acordo ao que o Concello chegou con empresas de gran dimensión: “no 2022 asinouse un acordo con Profand para estimular a contratación de veciños e veciñas na súa nave no polígono do Espírito Santo” e aposta en seguir traballando nesta liña para poder ir xerando oportunidades de emprego para os veciños e veciñas de Cambre entre as empresas que se instalen no polígono industrial.
Pan Lesta incide na posición estratéxica de Cambre como revulsivo para a chegada de máis empresas: “somos conscientes do potencial do Espírito Santo e levamos anos traballando para impulsar este parque industrial”. Neste sentido, a rexedora apunta que o Plan Xeral de Cambre en tramitación xa recollía ata tres procesos de ampliación para “seguir impulsando esta área industrial e poder acoller a máis empresas da capacidade de Amazon”.