Cambre encara o final da primeira fase do Decidámolo Xuntos cunhas cifras de participación positivas: nos primeiros días desta etapa, o Concello recibiu 227 propostas veciñais. A estas alturas do ano 2021, recibíranse 155 achegas cidadás. Isto é, o número de propostas aumentou un 46,45% con respecto á pasada edición. Así o confirma o alcalde, Óscar García Patiño, que confía “en que as cifras deste programa de participación continúen medrando, tal e como sucedeu o ano pasado”. O rexedor incidiu no seu compromiso con esta iniciativa “que para nós é unha ferramenta esencial de escoita activa e de participación cidadá”.
Estes números correspóndense co formulario en liña dispoñible na web decidamoloxuntos.cambre.org. A estes habería que sumar, ademais, as iniciativas trasladadas durante as reunións coas asociacións e as que están a chegar a través do correo decidamoloxuntos@cambre.org e dos buzóns colocadas nos locais sociais das parroquias.
Prazo aberto
Os veciños e veciñas poderán facer chegar as súas propostas ata o martes, 18 de outubro. Estas deberán ser de investimento e de competencia municipal. Para iso, a cidadanía dispón de varias vías: poderán cumprimentar o formulario da web decidamoloxuntos.cambre.es ou enchelo e depositalo ou entregalo nos buzóns localizados nos locais sociais das parroquias, en calquera dos tres rexistros municipais ou enviándoo ao correo decidamoloxuntos@cambre.org.
Próximas fases
A seguinte etapa do Decidámolo consistirá na análise das iniciativas veciñais por parte dos servizos técnicos. Unha vez concluído o estudo de todas as propostas, elaborarase unha listaxe coas que obtivesen unha maior votación segundo o manual de puntuación do proceso participativo. A última fase do programa municipal será a votación, dispoñible entre o 29 de outubro e o 7 de novembro. A previsión é que as propostas gañadoras da sétima convocatoria estean publicadas o 15 de novembro.
En caso de resultar gañadoras, estas incorporaríanse ao documento económico do Concello de Cambre para o 2023. Unha vez incluídas nos orzamentos, e tendo en conta os prazos de redacción, a solicitude de permisos ás administracións correspondentes e os períodos de contratación, o Concello poderá executar os proxectos nun prazo de dous anos naturais tal e como recolle o manual do programa.
