O Concello convoca a selección de teloneiros para o XXX Rock in Cambre

14 Xuñ 2022

O Boletín Oficial da Provincia publicou, esta mañá, as bases para a selección dos teloneiros que actuarán no XXX Rock in Cambre. O obxectivo, como apunta a concelleira de Cultura, Mónica Varela, “ é continuar apoiando e promovendo ás bandas locais, brindándolles a oportunidade de actuar no evento e de compartir escenario con agrupacións deste xénero de Galicia e do panorama nacional e internacional”. Tras dous anos de parón pola covid-19, a concelleira confía en que a próxima edición, que terá lugar o 12 e o 13 de agosto, “sexa memorable e, precisamente por iso, queremos que os grupos locais continúen tendo un papel esencial no festival”.

Poderán participar nesta convocatoria as bandas que cumpran os seguintes requisitos:

  • Polo menos un dos membros deberá estar empadroado no Concello de Cambre.
  • A antigüidade mínima deste empadroamento deberá ser dun ano.
  • O estilo musical deberá ser pop-rock-fusión.
  • Todos os compoñentes do grupo deberán ter cumpridos 16 anos antes do inicio do Rock in Cambre.

As agrupacións interesadas en participar deberán presentar o formulario de inscrición en calquera dos rexistros do Concello nun prazo de dez días hábiles contados a partir de mañá, mércores 15 de xuño. Ademais da ficha de inscrición, as bandas deberán presentar o volante individual de empadroamento, unha fotografía recente do grupo, unha ficha artística de cada grupo, un dossier –títulos, letras escritas e autoría dos temas presentados- e unha maqueta de dous temas de creación propia cunha duración máxima de 15 minutos (esta deberá enviarse ao correo electrónico cultura@cambre.org).

 

A selección dos grupos realizaraa un xurado e o fallo farase público o 8 de xullo. Os membros deste xurado escollerá a catro grupos, que terán a consideración de premiados. Así mesmo, elixirá a outros catro de reserva por se algún dos premiados non puidese actuar.

 

Os elixidos participarán no XXX Rock in Cambre, e dispoñerán duns 30 minutos para a súa actuación. Ademais, concederáselles un premio de 800 euros (netos) a cada un dos grupos premiados.

Tamén che pode interesar