O Concello cumpriu, nos últimos días, unha nova demanda veciñal por medio da instalación de tres puntos de arranxo e mantemento de bicicletas. Trátase dunha petición cidadá que se converteu nunha das propostas gañadoras do proceso participativo Decidámolo Xuntos. O alcalde, Óscar García Patiño, e o concelleiro de Deportes e Xuventude, Daniel Mallo, visitaron, xunto ao Club Ciclista Cambre-Caeiro e a Peña Ciclista Monte Xalo, un destes novos puntos, situado no paseo fluvial do río Mero.

Estes tótems están localizados en tres lugares estratéxicos do municipio: no exterior de Casa Palmeiras, en pleno paseo marítimo, na presa de Cecebre e na Barcala, dous puntos que forman parte do paseo fluvial do río Mero. A colocación destes elementos realizouse a partir das propostas dos propios clubs ciclistas de Cambre, que coñecen mellor cales son os roteiros máis empregados para a práctica deste deporte.

Estes elementos contan cun sistema antirrobo. Desta forma, calquera persoa que desexe facer uso das ferramentas do tótem deberá introducir, previamente, unha moeda. A continuación, o usuario ou usuaria poderá empregar as distintas ferramentas e, unha vez conclúa a reparación, terá que pechar a porta do tótem para recuperar a moeda.

Estas estacións inclúen varias ferramentas como unha bomba de aire para inflar as rodas, chaves inglesa e hexagonal de diferentes tamaños, alicates, chave de parafusos plano e de estrela e pancas para sacar a cuberta da roda.