A Xunta de Goberno Local adxudica a redacción do proxecto técnico para pavimentar a rúa Río Gandara, cun prazo de 12 meses e un investimento achegado aos 30.000 euros.

O Concello de Cambre deu un paso decisivo para mellorar a mobilidade peonil e a seguridade viaria na zona de A Barcala, unha área que durante anos estivo abandonada e que é unha das zonas onde este goberno inicia actuacións para reverter esa situación. A Xunta de Goberno Local adxudicou oficialmente a redacción do “Proxecto técnico para pavimentación de beirarrúas na rúa Río Gandara”, unha actuación largamente demandada polos veciños desta zona do municipio.

A obra, que se atopa actualmente na súa fase de planificación, ten un prazo de execución de 12 meses para a elaboración de toda a documentación técnica e un orzamento de licitación que ronda os 30.000 euros.

Mellora para unha zona de alta concentración veciñal

A elección desta rúa non é casual. A rúa Río Gandara é un eixe fundamental na trama urbana de A Barcala, xa que non só concentra un importante número de residentes, senón que tamén actúa como unha das principais vías de acceso ao barrio. Ata a data, o estado das beirarrúas supuña un inconveniente para os peóns, especialmente para persoas con mobilidade reducida, familias con carriños de bebé e escolares.

Con esta intervención, o goberno local busca dotar a zona dunha infraestrutura segura, ordenada e accesible para todos os cidadáns. A pavimentación das beirarrúas permitirá separar claramente os espazos de tránsito peonil e vehicular, mellorando a seguridade dos veciños e fomentando os desprazamentos a pé.

Dende o goberno municipal destacouse que esta actuación responde a un compromiso firme coa mellora continua dos espazos públicos en todas as parroquias, priorizando os investimentos naquelas infraestruturas que, como a rúa Río Gandara, redundan directamente na calidade de vida dos cidadáns e na cohesión dos barrios.