A alcaldesa, Diana Piñeiro, destacou a prioridade absoluta que o seu goberno deu a desbloquear e axilizar estas axudas, esenciais para as familias cambresas.
O Concello de Cambre deu un paso decisivo no seu apoio á educación e ás familias do municipio coa sinatura dos convenios de colaboración coas Asociacións de Nais e Pais de Alumnos (ANPAs) dos cinco centros de educación primaria públicos. Un investimento global que supera os 100.000 euros e que está destinado a subvencionar as actividades extraescolares.
Este importante desembolso, ratificado esta mañá nun acto institucional, reflicte o firme compromiso do goberno local coa comunidade educativa, asegurando a posta en marcha dunha oferta de actividades complementarias que enriquece a formación do alumnado e convértese nun pilar fundamental para a conciliación da vida familiar e laboral no municipio.
Beneficiarias das axudas
As ANPAs beneficiarias destes convenios, que son as entidades que xestionan e organizan gran parte da oferta de actividades extraescolares, corresponden aos seguintes centros educativos:
-
CEIP W. Fernández Flórez
-
CEIP Portofaro
-
CEIP Emilio González López
-
CEIP Gonzalo Torrente Ballester
-
CEIP O Graxal
Compromiso, axilidade e planificación de futuro
Durante o acto da sinatura, a alcaldesa de Cambre, Diana Piñeiro, puxo de relevo o esforzo realizado polo seu equipo de goberno para priorizar e axilizar todo o procedemento administrativo.
“Entendemos a importancia crítica destas subvencións para o normal desenvolvemento da vida escolar e para a conciliación das familias. Por iso, volcámonos en desbloquear e axilizar os trámites para que os fondos cheguen aos seus destinatarios o antes posible”, afirmou a rexidora.
Piñeiro recoñeceu o valor do traballo das ANPAs e sinalou que, aínda que estes convenios “non solucionan na súa totalidade os problemas estruturais que arrastran as ANPAs desde hai tempo, sen dúbida contribúen a palialos e a darlles a estabilidade necesaria”. Ademais, avanzou o obxectivo claro do seu goberno para os próximos cursos: “Aprendemos dos atrasos de convocatorias pasadas. A nosa meta é traballar con suficiente antelación para que estes acordos estean asinados e resolto antes do inicio do curso, proporcionando así a seguridade e planificación que as ANPAs e as familias merecen”.
Un pagamento único para maior liquidez
Para garantir a máxima eficacia da axuda, o Concello de Cambre realizará un único pagamento a cada ANPA unha vez finalizado o trámite administrativo. Esta medida busca dotar de liquidez inmediata ás asociacións, facilitando o pagamento aos monitores e permitindo que o inicio das actividades extraescolares se produza sen ningún tipo de demora.