O Concello presentou, esta mañá, unha denuncia ante a Garda Civil por un ataque intencionado ao aguacate situado na contorna do Museo do Xacemento Romano. Tal e como se conclúe nun informe elaborado pola empresa encargada do servizo de mantemento de xardíns e zonas verdes, o 80% deste exemplar está afectado polos danos, orixinados na zona do colo polo uso dunha broca.

O edil de Urbanismo, Obras, Servizos, Medio Ambiente e Transporte, Juan González Leirós, lamenta estes actos, que “teñen un impacto, non só nas arcas municipais, senón tamén no patrimonio do municipio, o que supón un prexuízo para todos os veciños e veciñas”.

Este estudo realizouse despois de detectar que algunhas das ramas do aguacate estaban danadas. No mesmo conclúese que a deterioración da árbore non responde a un factor biolóxico, xa que este non presentaba enfermidades, pragas, pudricións, fungos ou outras anomalías que puidesen xustificar a seca das follas. No informe determínase que os orificios presentes no colo son froito dun acto vandálico co que o autor ou autora buscaba secar a árbore.

O documento conclúe que o 80% da árbore está afectado e presenta poucas posibilidades de recuperación. En todo caso, farase un terciado da árbore e levarase a cabo un estudo da súa evolución nos meses de primavera e no inicio do verán. No caso de que non recobre o seu estado orixinal, procederase ao seu tallado.