A Concellería de Turismo e Patrimonio organizará, en novembro, unha nova sesión do seu programa As Noites do Museo. Nesta ocasión, a proposta consistirá nunha “visita experimental na que desvelaremos os segredos da igrexa de Santa María, un dos maiores tesouros do municipio”, explica o concelleiro de Turismo e Patrimonio, Ramón Boga. Unha das maiores particularidades será que esta actividade levará a cabo de noite co obxectivo de que “as persoas que asistan poidan centrar a súa mirada en detalles da igrexa que poden pasar desapercibidos no día a día”, explica Boga.

Baixo o título Desde unha mirada distinta: visita nocturna á igrexa de Santa María de Cambre, o concelleiro valerase dun foco de luz para guiar a mirada das persoas participantes. Desta forma, coa iluminación axudaráselles a centrar a vista en cada elemento arquitectónico brindándolles, ademais, unha breve explicación de cada un.

A visita guiada será o mércores, 22 de novembro, ás 20.30 horas. As persoas interesadas terán que inscribirse chamando ao teléfono do museo (981 65 62 17) ou enviando un correo a museo@cambre.org.

Trátase da segunda sesión que o Concello realiza dentro do programa. A primeira celebrouse no mes de outubro e foi unha charla sobre o Samaín a cargo do arqueólogo, Tito Concheiro.