O Concello e as asociacións contan xa os días para a celebración dunha das súas citas grandes: a Romaría Castrexo-Romana Galaicoi, que vivirá, o 15, 16 e 17 de xullo, a súa quinta edición. O teatro do Parque da Igrexa acolleu, esta mañá, a presentación do evento, na que tomaron parte o edil de Turismo e Patrimonio, Ramón Boga, a concelleira de Desenvolvemento Asociativo, María Carmen Pan Matos, a edil de Cultura, Mónica Varela, representantes dalgunhas das entidades que participarán na romaría e a Asociación Histórico-Cultural Gallaecia Viva. Durante o acto, os edís enumeraron as novidades da próxima edición. Entre elas, Boga destacou que, por primeira vez na historia do evento, levaranse a cabo tamén verbenas no propio castro.
O programa arrincará o venres, 15 de xullo (17.00 horas), coa asemblea dos clans. Esta actividade dará paso ao comezo das hostilidades entre castrexos e romanos. Desde ese momento e ata o final, os bandos enfrontados encerellaranse en múltiples batallas ata que o domingo, 17 de xullo, asinen o tratado de paz. O programa da romaría incluirá mercado, talleres, guerras e escaramuzas, desfiles, pasacalles e actividades de animación musical, representacións teatrais, etc.
Novidades desta edición
Este ano, incorporáronse dúas importantes novidades con respecto ás pasadas edicións: a organización de sesións vermú e de verbenas, o Campionato Castrexo para nenos e nenas e os II Xogos Olímpicos Castrexos, cuxas probas se sucederán ao longo de toda a programación.
No que a música se refire, a primeira actuación terá lugar o venres, 15 de xullo ás 23.00 horas, a cargo da Marabela de Cecebre. Ao día seguinte, sábado día 16, A Esmorga de Bribes amenizará a sesión vermú a partir das 15.00 horas. Ese mesmo día, ás 23.00 horas, a charanga Festicultores Troupe fará as delicias do público asistente. A última actuación musical no castro será o domingo, 17 de xullo, ás 14.00 horas coa charanga O Rumbo do Sardiñeiro-Fisterra.
Valor histórico
Durante a súa intervención, o concelleiro de Turismo e Patrimonio sinalou que a romaría “é xa un evento afianzado no calendario estival e que funciona como revulsivo para o tecido comercial e hostaleiro de Cambre”. En canto ás cifras de asistencia, o edil recoñeceu que os números “poderían mesmo duplicarse nesta quinta edición”, o que implicarían a chegada de miles de persoas ao longo dos tres días. A responsable da área de Turismo e Patrimonio indicou en que, máis aló das actividades lúdicas, a Galaicoi destaca pola súa “posta en valor do patrimonio e da historia de Cambre, así como pola recuperación dunha romaría tradicional con música, baile e xantar”. Boga concluíu a súa intervención animando á xente para sumarse á festa, “e, sobre todo, a vir caracterizados para manter vivo o espírito desta cita”.
O edil destacou “o enorme esforzo” realizado por todos os departamentos do Concello para que o evento salga adiante. Así mesmo, agradeceu o apoio dos concelleiros e concelleiras do goberno local e do alcalde, Óscar García Patiño.
Maior presencia de asociacións
No que ao tecido asociativo refírese, a V Galaicoi fixo historia. Tanto así, que na quinta edición contarán con cabanas no castro 24 entidades de todo o termo municipal e outros 14 particulares. Con todo, a romaría no castro estará aberta a todas as persoas que desexen sumarse. Na presentación, ao concelleira de Desenvolvemento Asociativo quixo agradecer “a grande implicación das asociacións”, ás que definiu “como a alma e como unha peza fundamental nesta romaría”. Proba do compromiso do tecido asociativo con esta cita foi, precisamente, a presenza dos membros das seguintes entidades na presentación desta mañá: Asociación de Veciños de Pravio, Asociación de Amas de Casa de Bribes, Asociación Cultural Garrulaxe, Asociación de Veciños O Palco de Meixigo, Asociación Aires de Sigrás, Asociación de Mulleres Vagalume de Brexo-Lema, Asociación Avelaíñas de Santa María do Amorne e de Sementeira.
