O Concello de Cambre colabora coa Asociación de Empresarios Cambre Empresarial na posta en marcha do seu concurso de decoración do Nadal, co que se premiará a creatividade nos fogares de veciños e veciñas, con 400 euros en bonos para realizar compras no comercio local de Cambre.

O concurso, xa en marcha, consistirá na decoración de fachadas e xardíns de vivendas unifamiliares do municipio. Neste sentido, premiaranse as tres mellores decoracións, con bonos de 250 euros para o primeiro posto, 100 euros para o segundo, e 50 euros para o terceiro.

Para participar, enviaranse vía WhatsApp ao número 635 41 81 73 un máximo de oito imaxes ou vídeos dun minuto mostrando a decoración, e incluíndo nome, apelidos, teléfono, dirección e localización exacta, ata as 23:59 horas do 19 de decembro de 2024.

As decoracións gañadoras serán elixidas por votación popular a través da web oficial do concurso, na que estarán subidas as imaxes e vídeos das persoas participantes.

Unha vez acabado o prazo de votación, as decoracións gañadoras serán notificadas por teléfono e anunciadas nas webs do Concello de Cambre (www.cambre.es) e da Asociación Cambre Empresarial (https://cambrempresarial.com). A entrega de premios terá lugar na Casa da Cultura Vila Concepción o domingo 22 de decembro.