O Concello levará ao pleno de hoxe, xoves 30 de marzo, a aprobación inicial das bases para a convocatoria de axudas a través de incentivos á contratación temporal do alumnado-traballador do taller PROXEDIS-Cambre (PROfesionais en XEriatría e DIScapacidade).

O concelleiro de Desenvolvemento Socioeconómico, Diego Alcantarilla, explica que “esta é a liña de traballo busca mellorar a empregabilidade dos veciños e veciñas” e destaca que “a través desta iniciativa, facilitaremos que o alumnado-traballador poida aplicar os coñecementos adquiridos no mundo laboral, aumentando así as súas posibilidades de atopar un traballo de longa duración”.

Estas axudas buscan fomentar a contratación laboral temporal das 20 persoas que, actualmente, están a participar no taller de emprego. Esta convocatoria, dotada cun orzamento de 30.000 euros, e subvencionada pola Xunta, permitirá incentivar ás empresas cunha subvención fixa de 1.500 euros por cada alumno-traballador contratado cunha duración mínima de 3 meses de alta na Seguridade Social e a xornada completa. As contratacións que se beneficien desta convocatoria deberán formalizarse entre o 30 de setembro e o 14 de outubro de 2023.