A xunta de goberno local adxudicou, esta semana, o contrato para ampliar a rede para parar os balóns do campo de fútbol de Lendoiro, na Barcala. Estas obras foron adxudicadas por 8.159,03 euros e servirán para dar resposta a unha demanda solicitada polos propios usuarios da instalación municipal. Este proxecto súmase a outras intervencións que o Concello realizou, nos últimos meses, para mellorar varios espazos deportivos do municipio.

Tras a revisión realizada polo persoal técnico, comprobouse que a rede situada detrás da portería norte ten unha altura insuficiente, o que provoca que os balóns a excedan nos adestramentos e partidos oficiais. Para solucionar este problema, elevarase a altura da rede actual, de 5,2 metros, dispoñendo de 14 tubos galvanizados de suxeición cos que a estrutura chegará aos 7,8 metros. Xunto aos postes, colocarase unha rede con liña de 3 milímetros que cubrirá todo o ancho do campo e a nova altura.

Outras melloras

Ás actuacións que o Concello acometerá, proximamente, no campo de Lendoiro hai que sumar outras melloras implementadas en diversas instalacións deportivas. Así, o Concello substituíu, recentemente, as redes de portería dos tres campos de fútbol municipais (Daniel Mallo, Lendoiro e Os Pinares). Así mesmo, no Daniel Mallo substituíuse o motor da persiana antivandálica.