O Concello ofrecerá un programa completo de actividades infantís como parte do XXX Rock in Cambre

4 Ago 2022

A oferta inclúe unha masterclass de batería e obradoiros de linguaxe musical, construción de instrumentos e danza.

Os nenos e nenas volverán ser protagonistas no Rock in Cambre. Nesta trinta edición do festival, os máis pequenos e pequenas da casa poderán gozar, non só do I Rock Infantil (domingo, 7 de agosto, no teatro do Parque da Igrexa), senón tamén dun completo programa que o Concello organizará durante a semana do Rock in Cambre. O concelleiro de Cultura, Deportes e Xuventude, Daniel Mallo, sinala que estas propostas son “unha acción máis que enriquece e reforza o obxectivo principal do evento: achegar á música á veciñanza, neste caso aos nenos e nenas”.

A programación, que terá lugar entre o 10 e o 13 de agosto, constará de catro obradoiros dirixidos a distintas idades. A primeira proposta será o mércores, 10 de agosto, e consistirá nunha masterclass de batería para nenos e nenas de entre 8 e 13 anos. Será nos locais de ensaio do Concello en dúas quendas, un de 17.00 a 18.00 horas e outro de 18.30 a 19.30 horas.

A seguinte iniciativa terá lugar ao día seguinte, o xoves día 11 de 17.00 a 18.00 horas, na Escola de Música Sementeira Cambre. Neste caso, tratarase da actividade Vive o Rock a mogollón, sobre linguaxe musical e destinadas a pequenos e pequenas de entre 6 e 12 anos.

As futuras xeracións de músicos de entre 6 e 12 anos poderán aprender, ademais, a construír o seu propio instrumento. Terán a oportunidade de facelo o venres, 12 de agosto, de 17.30 a 18.30 horas, en Vila Concepción.

A última actividade, Rock miúdo, será sobre danza e levará a cabo o sábado, día 13, no local da 3ª idade de Cambre, entre as 18.00 e as 19.00 horas. Neste caso, está dirixida a público de entre 4 e 12 anos.

As prazas son limitadas e para inscribirse será necesario chamar ao teléfono 981 65 62 17 (en horario de 11.00 a 14.00 horas e de 17.00 a 19.00 horas).

Tamén che pode interesar