O salón de plenos acollerá mañá, mércores 15 de novembro, ás 14.00 horas unha charla informativa sobre o programa de subvencións Consolida Cambre. Trátase dunha liña de axudas coas que o Concello busca promover a consolidación de proxectos empresariais no municipio. O encontro de mañá correrá a cargo de persoal técnico da Axencia de Desenvolvemento Local de Cambre, que informará os asistentes dos requisitos e pasos a seguir para solicitar estas subvencións.

A liña de 2023 conta cunha dotación orzamentaria de 80.000 euros, 20.000 máis que no exercicio anterior. Con respecto a 2022, as contías máximas a percibir polos beneficiarios pasarán de 1.100 a 2.500 euros.

En canto aos posibles destinatarios, poderán optar a estas axudas as persoas individuais ou socios de micropemes ou pemes de Cambre que se desen de alta na Seguridade Social entre o 1 de xaneiro de 2020 e o 31 de decembro de 2021 e que continúen de alta na data de publicación do extracto da convocatoria.

A contía máxima a conceder a cada persoa ou entidade beneficiaria non poderá superar os 2.500 euros. Esta axuda servirá para cubrir as cotas correspondentes do pago á seguridade social no Réxime especial de Traballadores/as por conta propia ou Autónomos/as (RETA) ou nalgunha mutualidade dos colexios profesionais correspondente aos 18 primeiros meses de actividade. O prazo de solicitude estará aberto ata o 10 de decembro.