- Os traballos consistiron na limpeza de gabias e marxes, redefinindo, ademais, os noiros. Ademais, procedeuse á escarificación da calzada e execución do pavimento.
O Concello acaba de concluír as obras de arranxo e posta en valor dun tramo do roteiro Xacobeo que discorre polo camiño municipal 125. Os traballos adxudicáronse por preto de 50.000 euros e contaron cun prazo de execución dun mes.
O alcalde, Óscar García Patiño, e o concelleiro de Turismo e Patrimonio, Ramón Boga, desprazáronse, nos últimos días, ata o lugar para comprobar o resultado destes traballos. O rexedor sinala que se trata dunhas actuacións “esenciais para garantir que o Camiño Inglés estea nas mellores condicións posibles”. García Patiño lembra que este roteiro Xacobeo “é un aliciente para a chegada de visitantes ao noso municipio, polo que o obxectivo deste tipo de actuacións non é outro que poñelo en valor”.
Como parte do proxecto, limpáronse as gabias e as marxes ao longo da vía, redefinindo, ademais, os noiros. Así mesmo, procedeuse á escarificación de calzada en toda a superficie e, finalmente, executouse o pavimento empregando, para iso, materiais naturais como pedra, terra e formigón, tal e como recomendan desde a Dirección Xeral de Patrimonio Cultural.
