Cambre volverá vibrar a ritmo de rock. Da man do XXXII Rock in Cambre, este sábado, 10 de agosto, ofreceranse ata dez horas de música con actuacións de grupos locais, galegos e nacionais. Carlos Tarque & la Asociación del Riff, Sexy Zebras, Aphonnic, Bestas, Recambios Tucho, Los Gremlins, Sen City Devils e Inadaptados serán os encargados de agrandar a lenda nesta trixésimo segunda edición do festival. O salón de plenos do Concello acolleu, esta mañá, a presentación oficial da cita, á que acudiron a alcaldesa, María Pan, o concelleiro de Cultura, Deportes e Xuventude, David Saborido, e os representantes dos grupos locais.
Durante a súa intervención, a rexedora agradeceu a presenza das agrupacións de Cambre, ás que definiu como parte “esencial”. De feito, tal e como lembrou a primeira edil, o Rock in Cambre xurdiu “da ilusión e as ganas dun grupo de veciños que querían ensinar a súa música aos seus amigos e no seu pobo”. Entre eles, a alcaldesa apuntou que Inadaptados foi un dos grupos fundadores do evento. Na mesma liña, o edil de Cultura, Deportes e Xuventude definiu a estas bandas como “unha peza imprescindible” e explicou que, neste 2024, introduciuse unha modificación importante para darlles un novo pulo: “habitualmente os grupos locais actuaban primeiro e, despois, continuaban o resto de bandas. Nesta 32ª edición imos intercalar a participación dos distintos grupos para que poidan ter a ocasión de tocar nos momentos de maior afluencia de público”.
Os concertos do sábado empezarán ás 18.15 e prolongaranse ata as 4.10 horas. En canto á orde, será o seguinte:
- Os Gremlins: 18.15 horas
- Bestas: 19.15 horas
- Inadaptados: 20.30 horas
- Aphonnic: 21.35 horas
- Carlos Tarque & La Asociación del Riff: 23.00 horas
- Sexy Zebras: 1.00 horas
- Sen City Devils: 2.30 horas
- Recambios Tucho: 3.25 horas
Para Os Gremlins, esta será a súa primeira vez no Rock in Cambre. Tanto Inadaptados como Sen City Devils son xa veteranos no evento, tocando xa en máis dunha ocasión.
Unha volta ás orixes
A cartelería e as camisetas foron deseñadas por Eva Bello. A idea era regresar aos deseños das primeiras edicións do Rock in Cambre e recuperar a temática oeste, dándolle, iso si, un toque actual e renovado.
Dispositivo de seguridade
O Rock in Cambre contará, este ano, cun Punto Violeta posto en marcha desde a Concellería de Servizos Sociais. Este espazo estará dispoñible ao longo de toda a noite e, nel, brindarase información e asesoramento ás mulleres ante calquera tipo de agresión sexual. O Concello poñerá en marcha un dispositivo de seguridade no que tomarán parte o persoal do Servizo Municipal de Emerxencias de Cambre e a Garda Civil.
Camisetas do festival
As camisetas da 32ª edición estarán dispoñibles a partir de mañá, venres 9 de agosto, no Museo Arqueolóxico. Os interesados poderán conseguilas nesta instalación mañá, de 17.00 a 20.00 horas, ou o sábado, 10 de agosto, de 11.00 a 14.00 horas. O sábado, a partir das 18.15 horas, estarán dispoñibles tamén na caseta da parada de taxis, no propio Campo da Feira.
Aparcamentos e autobuses
A compañía Alsa Calpita reforzará o servizo de autobús entre Cambre e A Coruña. Así, haberá buses de recollida que irán desde a capital municipal ata A Coruña ás 3.00 e ás 4.00 horas. En canto ao aparcamento, haberá zonas para estacionar na contorna do centro de saúde e do campo de fútbol Dani Mallo.