O Concello iniciou, xunto con COCEMFE e COGAMI, unha nova convocatoria do seu curso de Alfabetización dixital para pais e nais. A iniciativa, que arrincou leste mesmo mes, contou coa visita do concelleiro de Educación e Sanidade, Miguel Ángel Gutiérrez, que puido constatar o “grande interese” que o programa suscita entre os veciños e veciñas. Tanto así, que as persoas participantes na edición actual transmitiron ao edil o seu interese por ampliar a duración do curso para así poder profundar nos contidos impartidos. Gutiérrez avanza que a previsión é lanzar outra convocatoria no mes de xaneiro, procurando, iso si, ampliar os contidos e a duración do programa de sesións.

O obxectivo do programa, que se desenvolverá ata finais de novembro, é brindar aos pais, nais ou outros familiares as ferramentas necesarias para axudar aos nenos e nenas na súa formación. O concelleiro de Educación incide en que “se trata dunha medida esencial coa que os veciños e veciñas poderán favorecer o desenvolvemento formativo dos seus fillos e fillas”.

O programa está a levarse a cabo nas aulas de informática da Barcala e do Temple co fin de darlles máis facilidades aos veciños e veciñas á hora de acudir á actividade. En canto aos contidos, o programa ofrece formación á carta. É dicir, a temática defínese en función do nivel e das demandas dos participantes.