O Concello reafirma a súa aposta polo talento de Cambre coa apertura do prazo de solicitude dos locais de ensaio

20 Set 2022

Tamén che pode interesar

O Concello mantén a súa aposta polo talento de Cambre coa apertura do prazo de solicitude dos locais de ensaio. Trátase de tres instalacións situadas na urbanización A Barcala e que, no último medio ano, foron utilizadas por un total de 15 formacións: da cifra, 10 foron bandas e cinco foron solistas. Atendendo a estes números, o concelleiro de Deportes e Xuventude, Daniel Mallo, incide no compromiso do goberno local “por seguir ofrecendo estas dependencias que consideramos esenciais para darlles aos grupos un lugar onde ensaiar”.

O período de solicitude estará aberto entre hoxe, martes 20 de setembro, e o día 30. As formacións interesadas poderán tramitar a súa petición cubrindo a documentación dispoñible na páxina web municipal e entregándoa a través do rexistro municipal ou da sede electrónica.

Poderán acceder a estas instalacións os grupos que conten, como mínimo, cun membro empadroado Cambre. Os solistas deberán cumprir tamén este requisito. No caso das agrupacións, o Concello outorgará unha maior puntuación ás que teñan un maior número de empadroados e a aquelas que conten con máis novos dentro da banda.

Unha vez se reciban todos os formularios, confeccionarase un calendario. Desta forma, cada solicitante terá a posibilidade de elixir o seu horario predilecto entre o luns e o domingo desde as 10.30 ata as 22.30 horas. Terán acceso, como mínimo, a dúas horas de uso que poderían verse incrementadas en función do número de solicitudes que se reciban. O emprego destes espazos é completamente gratuíto. A cambio do uso destas salas, os grupos tan só deberán actuar nalgún evento de carácter municipal.