A contorna da rúa Francisco Rodríguez terá, proximamente, unha nova estética e unha maior funcionalidade e seguridade. O Concello acaba de sacar a licitación un proxecto de reordenación que se executará en tramos das rúas Celso Emilio Ferreiro e Francisco Rodríguez e co que se poñerá o foco en varios obxectivos: por unha banda, reforzarase a seguridade do tráfico rodado e, polo outro, acondicionarase o espazo para darlle un maior protagonismo ao peón fronte ao vehículo. As obras saíron a contratación por 76.399,3 euros (92.443,15 euros con IVE incluído) e cun prazo de execución de dous meses.
Actualmente, os aparcadoiros en oblicuo existentes nas inmediacións do parque infantil están deseñados para que os vehículos aparquen cara adiante. Esta circunstancia limita e reduce a visibilidade dos condutores cando realizan a saída marcha atrás. Os pavimentos na rúa atópanse en mal estado de conservación e as plaquetas das beirarrúas están obsoletas. A maiores, o Concello detectou a necesidade de darlle un maior protagonismo ao peón fronte ao vehículo, o que implicará a mellora estética da contorna procurando integrar esta actuación no ámbito do parque Ramón Barba, situado a poucos metros.
Para resolver estes problemas, o Concello reordenará os aparcadoiros, que se deseñarán en oblicuo e marcha atrás para mellorar a seguridade viaria nas manobras de saída dos coches estacionados. O Concello renovará os pavimentos e executará unha calzada ao mesmo nivel nos tramos de rúa perimetrais ao parque infantil, garantindo a convivencia entre o tráfico peonil e rodado. Por último, o proxecto incluirá a mellora estética desta área empregando, para eles, materiais atractivos e similares aos xa usados na contorna próxima ao lugar de actuación. As obras completaranse coa instalación de nova sinalización horizontal e vertical, do mobiliario urbano e de novas árbores.
