O concelleiro de Educación e Sanidade sinala que estas cifras confirman a necesidade de “seguir apostando por medidas que favorezan a conciliación da vida laboral e familiar da cidadanía”.

O Concello acaba de pechar o prazo de solicitude do programa de conciliación Mañanceiro. Fíxoo tras recibir máis de 400 solicitudes por parte das familias do municipio. Isto é, preto dun 15% máis con respecto ao curso anterior. O edil de Educación e Sanidade, Miguel Ángel Gutiérrez, valora estas cifras e indica que confirman a necesidade de “seguir apostando por medidas e iniciativas que favorezan a conciliación da vida persoal e familiar da cidadanía”.

O Mañanceiro comezará co inicio do ano académico, implantándose, de novo, nos seguintes centros de ensino: E.E.I San Bartolomeu de Pravio e os CEIPS Wenceslao Fernández Flórez, Gonzalo Torrente Ballester, Emilio González López, O Graxal e o colexio Portofaro.

A través deste servizo, que funcionará de luns a venres, os escolares poderán acceder ao centro ás 7.30 horas e permanecer alí ata o inicio das horas lectivas. O Concello ofreceu a posibilidade de almorzo para os pequenos e pequenas. Os veciños e veciñas tiveron a oportunidade, ademais, de solicitar o mes completo ou pagar por días soltos.

Máis aló da convocatoria de verán, os cambreses e cambresas poderán formalizar a súa inscrición ao longo de todo o curso académico sempre que haxa prazas dispoñibles.