A pesar da súa curta idade, o Rock Infantil converteuse nunha das citas ineludibles do verán en Cambre. Tanto é así que na súa segunda edición as persoas contáronse por centos e encheron o teatro do Parque da Igrexa. Tendo en conta estas cifras de participación, o Concello decidiu redobrar a súa aposta por este evento, facéndoo extensivo durante dous días. A cita para os pequenos terá lugar o venres, 2 de agosto, e o sábado, día 3, no CEIP Portofaro e no Parque da Igrexa, respectivamente. En total, ofreceranse cinco actuacións como parte do programa. Todas elas estarán dirixidas ao público familiar e buscarán transmitir aos máis novos a paixón por este xénero musical.

O edil de Cultura, Deportes e Xuventude, David Saborido, lembra que en Cambre hai unha gran devoción “pola música, en xeral, e polo rock and roll, en particular”. De feito, o municipio acolle, desde fai anos, o Rock in Cambre, un dos festivais do xénero máis lonxevos da comarca. Como explica o concelleiro, o Rock Infantil pretende “que esta devoción que os cambreses sentimos polo rock se poida transmitir tamén aos máis novos”. Saborido confía en que a terceira edición “poida superar as cifras de participación do ano pasado”.

O venres, 2 de agosto, a música aterrará no colexio Portofaro a partir das 19.00 horas. Ese día, o espectáculo correrá a cargo do grupo infantil Mamá Cabra e da banda The Music Patrol.

Ao día seguinte, sábado 3 de agosto, o Rock Infantil levarase a cabo no teatro do Parque da Igrexa. Ese día, a partir das 19.00 horas, o espectáculo iniciarase da man da Banda Xuvenil de Música Sementeira Cambre. A continuación, terá lugar unha sesión de rock co DJ Manri e Julia B.T. Co seu espectáculo Rock ‘N’ Magic, o Mago Teto encargarase do peche do evento.

O Concello preparou uns panos conmemorativos do Rock Infantil que regalará ás familias asistentes a algunha das dúas xornadas.