O Concello mellorará a pavimentación das beirarrúas da rúa Río Gándara (urbanización A Barcala). As obras, valoradas en 30.000 euros, financiaranse con cargo ao Plan Único da Deputación A Coruña, e servirán para dar continuidade á liña de traballo das últimas actuacións realizadas na zona.

O obxectivo da obra é dar continuidade ás beirarrúas, eliminando a rampla metálica existente para acceder tanto ao portal de vivendas do edificio número 6 desta rúa como á biblioteca municipal Xabier P. Docampo. A idea é deixar o mesmo acabado que o pavimento existente nas beirarrúas que foron reformadas tras os traballos de impermeabilización da zona.

Para acadar estes obxectivos levantaranse os pavimentos e elementos existentes neles. A continuación, procederase á execución da base do pavimento para, finalmente, proceder á realización dos acabados finais de pavimentos. Se é necesario, construiranse instalacións de recollida de augas pluviais. Ao remate destas intervencións, non só se incrementará o ancho da beirarrúa, senón que tamén se axustarán as súas alturas para permitir o acceso á biblioteca e ao portal sen necesidade de ramplas.