Co inicio do curso escolar, o Concello recupera o Ler conta moito, o programa de promoción á lectura con diversas actividades nas bibliotecas municipais. A iniciativa arrincará mañá, mércores 18 de setembro, e continuará durante as vindeiras semanas, con propostas na Biblioteca Central María Pita, na Xabier P. Docampo e nos Templarios.
A programación dará comezo mañá, mércores 18 de setembro, ás 17.30 horas na Biblioteca Central. Paula Carballeira chegará á instalación co seu Contos de sapos, bruxas e curuxas, un espectáculo dirixido a nenos a partir de 4 anos. Unha actividade coa que Carballeira buscará rescatar algunhas das ensinanzas que nos deixan os contos e que, co paso do tempo, quedan esquecidas.
Ao día seguinte, xoves 19 de setembro, ás 18.30 horas Trémola Teatro tomará a remuda na Biblioteca Os Templarios con Leo e a música. Neste caso, a actividade está destinada a pequenos e pequenas de 0 a 3 anos que terán que axudar a Leo, un león que quere devolverlle as cores aos seus amigos.
A última actividade desta semana será Contacontos en movemento: libros e ioga!, de Árbore Azul. Será o venres, 20 de setembro, ás 17.30 horas na Xabier P. Docampo. Neste caso, os destinatarios serán rapaces de 6 a 10 anos, que terán a ocasión de gozar dunha historia participativa con letras, imaxes e natureza.
A última actividade desta semana será Contacontos en movemento: libros e ioga!, de Árbore Azul. Será o venres, 20 de setembro, ás 17.30 horas na Xabier P. Docampo. Neste caso, os destinatarios serán rapaces de 6 a 10 anos, que terán a ocasión de gozar dunha historia participativa con letras, imaxes e natureza.
O mes rematará coa Zinética de Komorevi o venres, 27 de setembro, na Xabier P. Docampo (17.30 horas). Neste caso, é un taller no que os rapaces e rapazas de 7 a 10 anos aprenderán a elaborar un fanzine (unha pequena revista para fans) propio que, ao remate, poderán levar ás súas casas.
As inscricións poden tramitarse chamando ao teléfono da Biblioteca Central María Pita: 981 675 109.
