O Concello acaba de sacar a licitación o proxecto para reformar a planta baixa do centro sociocultural de Brexo-Lema. As obras saen a contratación cun valor estimado de contrato de 11.708 euros e permitirán ampliar o cuarto que, agora mesmo, funciona como office.

O edificio existente está conformado por tres pisos: o baixo, a primeira planta e a baixo cuberta. Actualmente, a planta baixa atópase acondicionada como office. Con estas obras búscase incrementar esta sala, dotándoa, á vez, dunha ventilación natural ao exterior da que carece na actualidade.

O proxecto contempla a realización dos seguintes traballos: demolición do tabique e das escaleiras existentes; apertura do oco na fachada para colocar unha xanela; execución da tabiquería autoportante de placas de xeso laminado para pechar a estancia ampliada; reconfiguración e construción da escaleira que se demole; realización dos remates de albanalería e, por último, labores de pintado.

O prazo de presentación de ofertas estará dispoñible ata o 14 de novembro. Unha vez formalizado o contrato, os traballos contarán cun período de execución de dous meses.