O Concello remitiu, esta semana, un escrito a Augas de Galicia pedindo a reparación “urxente” das cárcavas do paseo fluvial do río Mero. En concreto, trátase de varios foxos de gran profundidade que están localizados no acceso á senda, á altura da ponte das Insuas e que dificultan a entrada dos usuarios e usuarias.

A petición formulouse xa en setembro de 2022 pero, ata a data, o Concello non recibiu resposta por parte do organismo. O alcalde, Óscar García Patiño, sinala que se trata da segunda solicitude que o Concello fai respecto a esta situación e confía en que a administración “atenda a petición e execute unha actuación urxente para reparar as cárcavas”.

O rexedor lembra que o paseo fluvial do río Mero conta “é un dous espazos naturais máis concorridos do municipio, e ao que acoden moitos veciños e veciñas de Cambre e doutros concellos”. Tendo isto en conta, García Patiño incide en que resulta “esencial manter esta senda nas mellores condicións de seguridade e accesibilidade posibles”.