Cambre xa ten un Plan Estratéxico de Subvencións (PES) actualizado para o 2023. O Concello deu luz verde á proposta co voto favorable de Unión x Cambre, PSOE e Alternativa dos Veciños e coa abstención do resto de grupos da corporación. Ao longo da súa exposición, a concelleira de Economía, Facenda e Recursos Humanos, María Pan, sinalou que para o próximo ano “preséntanse importantes retos, especialmente, a nivel social por mor da crise económica actual”. Neste contexto, “criamos necesario adaptar o PES para que se axuste á realidade socioeconómica actual”. Entre as novidades da proposta, a concelleira destacou a suma dunha nova axuda de 4.450 euros dirixida á Asociación Galega co Pobo Saharauí, a subida na liña de emerxencia social, o aumento para axudas do Bonotaxi e o incremento da subvención ao ANPA Fendetestas do CEIP Wenceslao Fernández Flórez.
A axuda á Asociación Galega co Pobo Saharauí é de 4.450 euros. Esta contía servirá para financiar o proxecto Vacacións en Paz, co que varios nenos e nenas procedentes dos campamentos saharauís de Tindouf se trasladan ao municipio para pasar os meses de verán coas familias de Cambre.
O alcalde, Óscar García Patiño, xa sinalara o compromiso do Concello co labor desempeñado por esta entidade. Fíxoo no mes de setembro, cando recibiu ás familias de acollida e aos pequenos e pequenas que pasaron xullo e agosto en Cambre: Kalama, Yunes, Jadiyetu e Alien. Durante a súa estancia, os pequenos e pequenas recibiron asistencia médica, asistiron a clases de lingua española e galego e participaron, ademais, en numerosas alternativas de lecer. A subvención municipal busca garantir o mantemento deste proxecto, contribuíndo a que máis familias do concello poidan sumarse a esta iniciativa solidaria.
A concelleira de Benestar Social, Lúa Sanguiñedo, destaca que a subvención “busca, non só axudar a estes nenos e meniñas, senón tamén concienciar á cidadanía e poñer de manifesto a situación que viven no seu lugar de orixe”. A edil incide en que se pretende, ademais, “promover os valores de tolerancia e integración entre a veciñanza, facilitando así a convivencia e a integración de todas as persoas na comunidade”.
Emerxencia social
O Concello incrementa un 33% a liña de emerxencia social. Esta concíbese, novamente, como unha subvención prioritaria. Desta forma, o Concello poderá aumentar o montante (de 240.000 euros) para atender todas as necesidades veciñais. Unha comisión de intervención–servizos sociais reunirase, de forma bimensual, para analizar se é necesario aumentar a consignación da liña. No ámbito social, o Concello subiu ata os 20.000 euros o montante destinado á convocatoria anual de axudas económicas para persoas con diversidade funcional e mobilidade reducida (Bonotaxi).
Outras novidades
Outras das novidades do PES de 2023 é a subida de 2.000 euros que experimenta a liña de subvención do ANPA do Wenceslao Fernández Flórez. Este incremento realízase tendo en conta a previsión de alumnado e as necesidades e transporte para asistir ás actividades extraescolares.
Por último, a partida de axudas do Consolida Cambre increméntase ata os 80.000 euros coa finalidade de contribuír á consolidación de empresas e á xeración do emprego no municipio.
